قازاقستاندىق گەننادي گولوۆكين مەن مەكسيكالىق ساۋل «كانەلو» الۆارەس اراسىنداعى جەكپە-جەكتى وتكىزۋ ءۇشىن تالاسقا تاعى ءبىر مەملەكەت قوسىلدى.

بۇل تۋرالى ESPN حابارلايدى.

Golden Boy پروموۋتەرلىك كومپانياسىنىڭ يەسى وسكار دە لا حوييانىڭ ايتۋىنشا، جەكپە-جەكتى وتكىزۋدەن بىرىككەن اراب امىرلىگىدە ءۇمىتتى.

«ماعان اۋەلى دۋبايدان، سوسىن ۇلىبريتانيادان قوڭىراۋ ءتۇستى. بۇل جەكپە-جەككە بۇكىل الەم قىزىعىپ وتىر. كەلىس سوزدەر باستالعان سوڭ بۇل ماسەلە دە جۋىق ارادا شەشىلەدى»،– دەيدى دە لا حوييا.

قازىرگى تاڭدا گولوۆكين-الۆارەس جەكپە-جەگىنە سەگىز ارەنا كەزەكتە تۇر. ونىڭ نەگىزگى ۇشەۋى: لاس-ۆەگاستاعى T-Mobile Arena، نيۋ-يوركتەگى Madison Square Garden جانە داللاستاعى AT&T Stadium ستاديونى.

جەكپە-جەك ا قش جەرىنەن تىس ورىندا ءوتۋى دە ىقتيمال. بۇل رەتتە لوندونداعى «ۋەمبلي» ستاديونى مەن مەحيكوداعى «اتستەك» ستاديوندارى ءوتىنىش بىلدىرگەن. سونداي-اق، قازاقستان كاسىپقوي بوكس فەدەراتسياسى دا بۇل كەزدەسۋدىڭ ەلىمىزدە وتكىزىلۋىنە قاتىستى پىكىر ءبىلدىردى.

«ءبىز بۇل ماسەلەنى مۇقيات تالقىلاپ، جوسپارلاعانبىز. نەگىزىندە بۇل جەكپە-جەكتى ۇيىمداستىرۋعا بىزدە مۇمكىندىك بار. ەگەر ول قىركۇيەكتىڭ باسىندا بولسا استانادا وتكىزە الار ەدىك. الايدا ول كەزدە ەكسپو كورمەسى اياقتالىپ كەتەدى. گولوۆكين دە، «كانەلو» دا بۇل جەكپە-جەكتەن كوپ تابىس تاپقىسى كەلەتىندەرى بەلگىلى. سول سەبەپتى ا قش، مەكسيكا جانە انگليانىڭ مۇمكىندىكتەرى جوعارى»،– دەدى فەدەراتسيانىڭ ۆيتسە-پرەزيدەنتى ۆيكتور دەميانەنكو.

گولوۆكين- الۆارەس جەكپە-جەگى 16- قىركۇيەكتە وتەدى. كەزدەسۋدە گولوۆكينگە تيەسىلى WBC، WBA (Super)، IBF جانە IBO بەلدىكتەرى باسكە قويىلماق.