وسى حاباردى قولفوننان كورىڭىز
شي جينپيڭ نازاربايەۆپەن كەڭەس وتكىزدى
  • ۋاقىتى: 2017-06-12
  • جولداۋشى: سارماي
  • كورىلىم : 375 رەت
  • قاينار: ءتاڭىرتاۋ تورابى
  • باعالاۋ : 0 پارشا

ەكى ەل باسشىلارى جۇڭگو مەن قازاقستاننىڭ جاپپاي ستراتەگيالىق سەرىكتەستىك  قاتىناستىڭ ءتىپتى جوعارى دەڭگەيدە اقاۋسىز، ورنىقتى دامۋىن ىلگەرىلەتۋگە قوسىلدى

استانا مامانداندىرىلعان الەمدىك كورمەسىنىڭ جۇڭگو مەملەكەتتىك سارايىن بىرگە ەكسكۋرسيالادى ءارى جۇڭگو مەن قازاقستاننىڭ ەۆرازيا ترانسشەكارالىق تاسىمالى جونىندەگى بەينە بايلانىس سالتىنا قاتىناستى

مەملەكەت ءتوراعاسى شي جينپيڭ 8 - ماۋسىمدا استانادا قازاقستاننىڭ زۇڭتۇڭى نۇرسۇلتان نازاربايەۆپەن كەڭەس وتكىزدى. كەڭەستەن كەيىن، ەكى ەلدىڭ باسشىلارى «جۇڭحۋا حالىق رەسپۋبليكاسى مەن قازاقستان رەسپۋبليكاسىنىڭ بىرلەسكەن مالىمدەمەسىنە» قول قويدى ءارى كوپتەگەن ەكى جاقتى سەلبەستىك حۇجاتتارىنىڭ قول قويىلۋ ساتتەرىنە كۋا بولدى، سونداي - اق تىلشىلەرمەن كەزدەستى

شينحۋا اگەنتتىگىنىڭ 8 - ماۋسىمدا استانادان بەرگەن حابارى. مەملەكەت ءتوراعاسى شي جينپيڭ 8 - ماۋسىمدا استانادا قازاقستاننىڭ زۇڭتۇڭى نۇرسۇلتان نازاربايەۆپەن كەڭەس وتكىزدى. ەكى ەلدىڭ باسشىلارى جۇڭگو مەن قازاقستان ديپلوماتيالىق قارىم - قاتىناس ورناتقان 25 جىلدان بەرگى ەكى جاقتى قاتىناستىڭ دامۋىندا قول جەتكەن زور جەتىستىكتەرگە بەلسەندى باعا بەرىپ، ەكى ەلدىڭ كەلەسى كەزەڭدەگى سەلبەستىگىنىڭ ماڭىزدى باعىتى مەن سالالارىن جوبالاپ، جۇڭگو مەن قازاقستاننىڭ جاپپاي ستراتەگيالىق سەرىكتەستىك قاتىناسىنىڭ ءتىپتى جوعارى دەڭگەيدە اقاۋسىز، ورنىقتى دامۋىن ىلگەرىلەتىپ، ەكى ەل حالىقتارىن ءتىپتى جاقسى باقىتقا كەنەلتۋدى ۇيعاردى.

شي جينپيڭ بىلاي دەپ اتاپ كورسەتتى: بيىل جۇڭگو مەن قازاقستاننىڭ ديپلوماتيالىق قارىم - قاتىناس ورناتقاندىعىنىڭ 25 جىلدىعى. ديپلوماتيالىق قارىم - قاتىناس ورناتقاننان بەرى، جۇڭگو - قازاقستان قاتىناسىنىڭ دامۋىندا جۇرتتى جالت قاراتقان جەتىستىكتەرگە قول جەتتى. ەكى ەل اراسىندا ءوزارا ساياسي سەنىم بۇرىن بولماعان دەڭگەيگە جەتىپ، جاپپاي ستراتەگيالىق سەرىكتەستىك قاتىناس ورناپ، دامۋ ستراتەگيالارىنىڭ ءتۇيىلىسۋىن ىسكە اسىردى. ەكى جاق جوعارى جىكتەر اراسىنداعى تىعىز قاتىناستى ساقتاپ، حالىقارالىق ىستەردە جاقىن سەلبەسىپ، وزەكتى ماسەلەلەردە ءبىرىن - ءبىرى باتىل قولدادى. ەكى جاق سەلبەستىگىنىڭ كەڭدىگى، تەرەڭدىگى، كولەمى، ساپاسى ۇزدىكسىز ارتىپ، گۋمانيتارلىق سەلبەستىك كۇن سايىن جاندانا ءتۇستى.

شي جينپيڭ بىلاي دەپ باسا دارىپتەدى: جۇڭگو - قازاقستان قاتىناسىنىڭ قىسقا ۋاقىت ىشىندە قارىشتاپ دامۋىنداعى سەبەپ − ەكى جاقتىڭ تاتۋ كورشىلىك دوستىق، ءوزارا تيىمدىلىك جاساۋ، ءوزارا كومەكتەسۋ رۋحىن باستان - اياق باسشىلىققا الىپ، ءوزارا قۇرمەت ەتۋ، تەڭ دارەجەدە ءوزارا پايدا جەتكىزۋ پرينسيبىنە باستان - اياق تاباندى بولىپ، ۇرپاقتار بويى دوس بولۋ، بىرگە دامۋ ۇستانىمىن باستان - اياق اتقارعاندىعىندا. جۇڭگو قازاقستانمەن بىرگە، ەكى ەلدىڭ دامۋ ستراتەگيالارىنىڭ ءتۇيىلىسۋىن جاپپاي جوبالاپ، ءار سالاداعى دوستىق قارىم - قاتىناس پەن ءوزارا پايدا جەتكىزۋ سەلبەستىكتەرىن نىعايتىپ، ءتىپتى بەرىك مۇددە ورتاق قوعامداستىعى مەن تاعدىر ورتاق قوعامداستىعىن قۇرىپ، ماڭگى جاقسى كورشى، جاقسى دوس، جاقسى سەرىك بولۋدى قالايدى.

نۇرسۇلتان نازاربايەۆ مىنالاردى ءبىلدىردى: ءتوراعا شي جينپيڭنىڭ جۇڭگو مەن قازاقستاننىڭ ديپلوماتيالىق قارىم - قاتىناسىنىڭ 25 جىلدىعى قارساڭىندا قازاقستانعا ساپارلاي كەلگەنىن قىزۋ قارسى الامىن، وسى جولعى ساپارىنىڭ قازاقستان مەن جۇڭگونىڭ جاپپاي ستراتەگيالىق سەرىكتەستىك قاتىناسىن بارىنشا جەبەيتىندىگىنە سەنەمىن. قازىرگى تاڭدا، قازاقستان - جۇڭگو قاتىناسىنىڭ دامۋ جاعدايى تاماشا، ەكى ەلدىڭ سەلبەستىك مۇمكىندىكتەرى زور. قازاقستان جۇڭگومەن ەكونوميكا - ساۋدا، ساياسي، مادەنيەت سياقتى سالالارداعى ءوزارا پايدالى سەلبەستىكتەردى تەرەڭدەتىپ، ب م ۇ، شاڭحاي سەلبەستىك ۇيىمى اياسىندا قارىم - قاتىناس جاساپ، سەلبەسۋدى قالايدى. ءتوراعا شي جينپيڭنىڭ استانادا دارىپتەگەن «ءبىر بەلدەۋ، ءبىر جول» قۇرىلىسى كەلەلى ءمان الادى. قازاقستان «ءبىر بەلدەۋ، ءبىر جول» اياسىندا ترانسشەكارالىق تاسىمال، ءوندىرىس قۋاتى، ونەركاسىپ باقشا رايونى، فينانس، اۋىل شارۋاشىلىعى، گۋمانيتارلىق سالالارىنداعى سەلبەستىكتەرگە بەلسەنە قاتىناسۋدى قالايدى.

ەكى جاق جان - جاقتى ستراتەگيالىق سەرىكتەستىك قاتىناستى دامىتۋ باعىتىنان جازباي، جوعارى جىكتەگىلەر اراسىنداعى بارىس - كەلىس پەن مەحانيزمدىك بارىس - كەلىستەردى تىعىز ساقتاپ، قارسى جاقتىڭ ءوز ەلىنىڭ مەملەكەت جاعدايىنا سايكەس تاڭداعان دامۋ جولىنا جانە قولدانعان ىشكى - سىرتقى ساياساتتارىنا قۇرمەت ەتىپ، وزەكتى مۇددەلەرىن قورعاۋ جولىندا جاساعان قۇلشىنىستارىن ءوزارا قولداپ، ءوڭىردىڭ حاۋىپسىزدىگى مەن ورنىقتىلىعىنا قاتەر توندىرەتىن سايىستارعا بىرگە توتەپ بەرۋگە قوسىلدى.

ەكى جاق «ءبىر بەلدەۋ، ءبىر جول» قۇرىلىسىنىڭ «نۇرلى جول» جاڭا ەكونوميكالىق ساياساتىمەن ءتۇيىلىسۋىن تەزدەتىپ، ەكى ەلدىڭ دامۋ ستراتەگيالارىنىڭ تەرەڭ توعىسۋىن ىسكە اسىرۋعا قوسىلدى. مۇنداعى ءتۇيىن − جاڭا ەۆروپا - ازيا قۇرلىق كوپىرىنىڭ، جۇڭگو - ورتا ازيا - باتىس ازيا ەكونوميكالىق ءدالىزى قۇرىلىسىنىڭ قازاقستاننىڭ حالىقارالىق زات تاسىمال ارناسىن اشۋ ستراتەگياسىمەن ءتۇيىلىسۋىن، حالىقارالىق ءوندىرىس قۋاتى سەلبەستىگىنىڭ قازاقستاننىڭ ونەركاسىپتەندىرۋدى جەدەلدەتۋ بارىسىمەن ءتۇيىلىسۋىن، جۇڭگونىڭ قۇرلىق، تەڭىز بىرلەسكەن تاسىمالى جاعىنداعى ارتىقشىلىعىنىڭ قازاقستاننىڭ شىعىستا تەڭىز ارقىلى تاسىمالداۋ سۇرانىسىمەن ءتۇيىلىسۋىن، «سيفرلى جىبەك جولى» دارىپتەمەسىنىڭ «سيفرلى قازاقستان» ستراتەگياسىمەن ءتۇيىلىسۋىن ىسكە اسىرۋ.

ەكى جاق ءوندىرىس قۋاتى مەن قارجى قوسۋ سەلبەستىگىن كۇشەيتىپ، ەكى ەلدىڭ ساۋدا قۇرىلىمىن جاقسارتىپ، ونەركاسىپ باقشاسىن بىرلەسىپ قۇرۋدى قولداپ، ءوزارا بايلانىستى كۇشەيتىپ، نەگىزدىك قۇرىلعىلار قۇرىلىسى، قاتىناس، زات تاسىمالى، جاڭالىق اشۋ، جاساۋ كاسىبى، اۋىل شارۋاشىلىعى، ورمان شارۋاشىلىعى، فينانس، ەنەرگيا، عىلىم - تەحنيكا، قورشاعان ورتانى قورعاۋ سالالارىنداعى سەلبەستىكتەردى تەرەڭدەتۋگە قوسىلدى. ەكى جاق گۋمانيتارلىق قارىم - قاتىناستى كۇشەيتىپ، جەرگىلىكتى ورىندار سەلبەستىگىن بەلسەنە ورىستەتۋگە، ەكى ەل جاستارى اراسىنداعى قارىم - قاتىناستى جەبەپ، مەديا، وقۋ - اعارتۋ، دەنساۋلىق ساقتاۋ، سپورت، ساياحات سالالارىنداعى سەلبەستىكتەردى كەڭەيتۋگە قوسىلدى. جۇڭگو قازاقستاننىڭ استانا مامانداندىرىلعان الەمدىك كورمەنى ويداعىداي وتكىزۋىن قولدايدى.

ەكى جاق كەلەلى حالىقارالىق جانە وڭىرلىك ماسەلەلەردە تىعىز قاتىناستى ساقتاپ، ب م ۇ، شاڭحاي سەلبەستىك ۇيىمى، ازياداعى ءوزارا ىقپالداستىق جانە سەنىم شارالارى جونىندەگى كەڭەس سياقتى كوپ جاقتى جيەكتەمەلەر ىشىندە سايكەسۋ مەن سەلبەسۋدى كۇشەيتىپ، «ءۇش ءتۇرلى كۇشكە»، سونداي - اق ەلارالىق ۇيىمداسقان قىلمىستارعا بىرگە سوققى بەرىپ، عالامدىق جانە وڭىرلىك سايىستارعا توتەپ بەرىپ، ەكى ەلدىڭ ورتاق مۇددەسىن قورعاپ، جەر شارىنىڭ جانە ءوڭىردىڭ بەيبىتشىلىگىن، حاۋىپسىزدىگىن، ورنىقتىلىعىن قامتاماسىز ەتۋگە قوسىلدى.

ەكى جاق شاڭحاي سەلبەستىك ۇيىمىنىڭ حالىقارالىق قاتىناستاعى ماڭىزدى بەلسەندى رولىنا بەلسەندى باعا بەرىپ، «شاڭحاي رۋحىن» باسشىلىققا الا وتىرىپ، شاڭحاي سەلبەستىك ۇيىمى اياسىنداعى ساياسي، حاۋىپسىزدىك، ەكونوميكا - ساۋدا، گۋمانيتارلىق سالالارداعى سەلبەستىكتى تەرەڭدەتۋگە جانە دامىتۋعا قوسىلدى. شي جينپيڭ قازاقستاننىڭ بىلتىر ءتوراعا ەلدىك مىندەتتى ۇستىنە العاننان كەيىن شاڭحاي سەلبەستىك ۇيىمىنىڭ ءتۇرلى سالاداعى سەلبەستىگىن تەرەڭدەتۋ، استانا باس قوسۋىن جاقسى وتكىزۋ جولىندا جاساعان قىرۋار اسا ءونىمدى قىزمەتتەرىن جوعارى باعالادى، جۇڭگونىڭ كەزەكتى ءتوراعا ەلدىك مىندەتتى وتكىزىپ العان سوڭ، ءار جاقپەن بىرگە، استانا باس قوسۋىنىڭ ورتاق تانىمىن شىن مانىندە تياناقتاندىرىپ، ۇيىمنىڭ ءتىپتى جاپپاي سەلبەستىك، ءتىپتى ىسكەر ىنتىماقتاستىق، ءتىپتى جوعارى ءونىمدى ارەكەت باعىتىنا قاراي دامۋىن قامتاماسىز ەتۋدى قالايدى. نازاربايەۆ قازاقستاننىڭ جۇڭگونىڭ شاڭحاي سەلبەستىك ۇيىمىنىڭ كەزەكتى ءتوراعا ەلدىك بورىشىن جاقسى وتەۋىن قولدايتىندىعىن ءبىلدىردى.

كەڭەستەن كەيىن، ەكى ەلدىڭ باسشىلارى «جۇڭحۋا حالىق رەسپۋبليكاسى مەن قازاقستان رەسپۋبليكاسىنىڭ بىرلەسكەن مالىمدەمەسىنە» قول قويدى ءارى ەكونوميكا - ساۋدا، فينانس، نەگىزدىك قۇرىلعىلار قۇرىلىسى، سۋ يگىلىگى، ساپالىق تەكسەرۋ، باجى ىستەرى، گۋمانيتارلىق سالالارىنداعى كوپتەگەن ەكى جاقتى سەلبەستىك حۇجاتتارىنىڭ قول قويىلۋ ساتتەرىنە كۋا بولدى.

ەكى ەلدىڭ باسشىلارى تىلشىلەرمەن كەزدەستى.

كەڭەستىڭ الدىندا، شي جينپيڭ نازاربايەۆتىڭ زۇڭتۇڭ مەكەمەسىندە وتكىزگەن سالتاناتتى قارسى الۋ سالتىنا قاتىناستى.

جەرگىلىكتى ۋاقىت بويىنشا تۇستەن بۇرىن ساعات 11دە، شي جينپيڭ زۇڭتۇڭ مەكەمەسىندە نازاربايەۆتىڭ قىزۋ قارسى الۋىندا بولدى. شي جينپيڭ قازاقستاننىڭ نەگىزگى مانساپتىلارىمەن قول الىسىپ امانداستى. نازاربايەۆ جۇڭگودان بارعان كىسىلەرمەن قول الىسىپ امانداستى. ەكى ەلدىڭ باسشىلارى پارات مىنبەسىنە شىقتى، اسكەري وركەستر جۇڭگو مەن قازاقستاننىڭ مەملەكەت گيمندەرىن ورىندادى. شي جينپيڭ نازاربايەۆتىڭ سەرىك بولۋىندا قۇرمەت قاراۋىلىن كوزدەن كەشىردى.

ۋاڭ حۋنيڭ، لي جانشۋ، ياڭ جيەچى جوعارىداعى قيمىلدارعا قاتىناستى.

شينحۋا اگەنتتىگىنىڭ 8 - ماۋسىمدا استانادان بەرگەن حابارى. قازاقستاندا ساپاردا جۇرگەن مەملەكەت ءتوراعاسى شي جينپيڭ قازاقستان زۇڭتۇڭى نازاربايەۆتىڭ سەرىك بولۋىمەن 8 - ماۋسىم كۇنى استانا مامانداندىرىلعان الەمدىك كورمەسىنىڭ جۇڭگو مەملەكەتتىك سارايىن ارالادى ءارى جۇڭگو - قازاقستان اراسىنداعى ازيا - ەۆروپا ترانسشەكارالىق تاسىمال بويىنشا بەينە بايلانىس مۇراسمىنا بىرگە قاتىناستى.

شي جينپيڭ مەن نازاربايەۆ جۇڭگو مەملەكەتتىك سارايىنىڭ سىرتقى زالىنا جەتكەندە، جۇڭگودان كەلگەن ءار ۇلت ارتيستەرى «ءتاتتى اۋەن، شات كۇلكى» دەگەن ءان - بيمەن ەكى مەملەكەت باسشىسىنىڭ وسىندا قادام قويعانىن قىزۋ قارسى الدى.

شي جينپيڭ مەن نازاربايەۆ جۇڭگو مەملەكەتتىك سارايىنا كىرىپ، «<ءبىر بەلدەۋ، ءبىر جول> − ۇلى ارناداعى ساپاردان» ءۇزىندى كوردى. ەكى ەل باسشىسى ەنەرگيا ءدالىزى جانە «زياتتى ەنەرگيامەن وتكەن ءبىر كۇن» اتتى كورمە بولىكتەرىن، بولاشاق ەنەرگياسى اتىنداعى ارمان تەاترىن، عالامدىق مىندەتتەر جانە سەرىكتەستىك كورمە بولىگىن، ت.ب ارالادى. «زياتتى ەنەرگيامەن وتكەن ءبىر كۇن» كورمە بولىگىندە، شي جينپيڭنىڭ شاقىرۋىمەن نازاربايەۆ جوعارى جىلدامدىقتى پويەزدىڭ سيمۋلياتورلىق جۇرگىزىلۋىن سەزىندى. ەكى ەل باسشىسى كورمە سارايىن ارالاۋ بارىسىندا ۇنەمى پىكىر اۋىسىپ وتىردى.

استانا مامانداندىرىلعان الەمدىك كورمەسى العاش رەت ورتا ازيا ەلدەرىندە وتكىزىلىپ وتىرعان مامانداندىرىلعان الەمدىك كورمە، تاقىرىبى − «بولاشاق قۋاتى». وسى رەتكى مامانداندىرىلعان الەمدىك كورمەگە قاتىسقان 100 نەشە مەملەكەت پەن حالىقارالىق ۇيىمنىڭ اراسىندا، جۇڭگو مەملەكەتتىك ساراي قۇرىلىسىن بارىنەن بۇرىن باستاعان ەدى. جۇڭگو مەملەكەتتىك سارايىنىڭ بەلگىلەگەن تاقىرىبى − «بولاشاق ەنەرگيا، جاسىل جىبەك جول»، ماقسات − جۇڭگونىڭ ءداستۇرلى ەنەرگيا كوزدەرىن تۇرلەندىرۋ، جاڭا ەنەرگيا كوزدەرىن اشۋ، قورشاعان ورتانى قورعاۋ، باياندى دامۋ، ت. ب جاقتارىنداعى ۇستانىمدارى مەن ادىستەرىن حالىقارالىق قوعاممەن ءبولىسۋ.

سوڭىندا، ەكى ەل باسشىسى جۇڭگو مەملەكەتتىك سارايىندا وتكەن جۇڭگو - قازاقستان اراسىنداعى ازيا - ەۆروپا ترانسشەكارالىق تاسىمال بويىنشا بەينە بايلانىس مۇراسىمىنا قاتىناستى.

شي جينپيڭ مەن نازاربايەۆ جۇڭگو - قازاقستان ترانسشەكارالىق تاسىمال سەلبەستىگى تۋرالى قىسقا مەتراجدى فيلمدى زەيىن قويا كورىپ شىقتى. وسى جەردەن ىلگەرىندى - كەيىندى جۇڭگو - قازاقستان ليانيۇنگاڭ زات اينالىمى سەلبەستىك بازاسى مەن «قورعاس - شىعىس قاقپاسى» ارنايى ەكونوميكالىق ايماعىنىڭ قۇرعاق ايلاعىنا بەينە بايلانىس ورناتىلدى، بەينە ەكراننان ەكى جەردەگى رەيستەردىڭ جۇمىس جاعدايى، جۇكتەردىڭ تيەلۋى جانە قۇرامالاردىڭ قۇرالۋى كورسەتىلدى، ەكى ەلدىڭ قاتىستى جاۋاپتىلارى جاعداي تانىستىردى. ەكى ەل باسشىسى تۇتقانى قاتار قوزعاعاندا، بەينە ەكراننان ەكى بولىمشە الاڭنان 4 پويەزدىڭ گۋدوك شالىپ، جولعا شىققانى كورسەتىلدى. ەكى ەل باسشىسى ءبىر - بىرىنە قۇتتى بولسىن ايتتى.

شي جينپيڭ ارناۋ سوزىندە مىنالاردى اتاپ كورسەتتى: جۇڭگو - قازاقستان اراسىنداعى ازيا - ەۆروپا ترانسشەكارالىق جۇك پويەزدەرىنىڭ ىسكە قوسىلۋى جۇڭگو مەن قازاقستانعا پايدالى بولىپ قالماستان، «ءبىر بەلدەۋ، ءبىر جول» بويىنداعى قاتىستى مەملەكەتتەرگە دە تاسىمال جەڭىلدىگى مەن سەلبەستىك ورايلارىن اكەلەدى، بۇل جىبەك جولى ەكونوميكالىق بەلدەۋى مەن 21 - عاسىرداعى تەڭىز جىبەك جولىنىڭ جاندى تۇيىلىسكەنىن كورسەتەدى. ەكى جاق «جىبەك جولى ەكونوميكالىق بەلدەۋ قۇرىلىسى مەن <نۇرلى جول> جاڭا ەكونوميكالىق ساياساتىن ءتۇيىلىستىرۋ تۋرالى سەلبەستىك جوباسىن» بەلسەنە تياناقتاندىرادى. قازاقستان ءداستۇرلى ىشكى قۇرلىقتىق مەملەكەتتەن ازيا - ەۆروپا ۇلى قۇرلىعىنداعى شەشۋشى تاسىمال تورابىنا اينالىپ، شىعىس پەن باتىستىڭ ساۋدا تىزبەگىندەگى ماڭىزدى رولى كۇن ساناپ ارتىپ كەلەدى. جۇڭگو - قازاقستان ترانسشەكارالىق تاسىمال سەلبەستىگىنىڭ ۇزدىكسىز تەرەڭدەۋى ءوڭىردىڭ دامۋى مەن گۇلدەنۋىنە ءتىپتى زور كۇش ۇستەيتىن بولادى. ەكى جاقتىڭ ۇزدىكسىز تۇردە كۇش بىرىكتىرە سەلبەسىپ، ليانيۇنگاڭ مەن قورعاس ارقىلى جالعانعان جاڭا ازيا - ەۆروپا قۇرلىق - تەڭىز بىرلەسكەن تاسىمال ارناسىن «ءبىر بەلدەۋ، ءبىر جول» سەلبەستىك دارىپتەمەسىندەگى ۇزدىك جانە ۇلگىلى نىسانعا اينالدىرىپ، بەيبىتشىلىك جولىن، وركەندەۋ جولىن، اشىق جولدى، جاڭالىق جولىن، وركەنيەتتەر جولىن بىرگە گۇلدەندىرۋىن ءۇمىت ەتەمىن.

نازاربايەۆ ارناۋ سوزىندە ءتوراعا شي جينپيڭنىڭ استانا مامانداندىرىلعان الەمدىك كورمەسىنىڭ اشىلۋ سالتىنا كەلىپ قاتىناسقانىنا، جۇڭگونىڭ وسى رەتكى الەمدىك كورمەگە بار كۇشپەن قولداۋ كورسەتكەنىنە جانە بەلسەنە ات سالىسقانىنا العىس ايتتى. ول مىنالاردى ءبىلدىردى: جۇڭگو مەملەكەتتىك سارايىنىڭ تاقىرىبى جاسىل جىبەك جولىنىڭ دامۋ ۇستانىمىن تولىق ايگىلەيدى. قازاقستان - جۇڭگو اراسىنداعى ازيا - ەۆروپا ترانسشەكارالىق تاسىمال سەلبەستىگى «نۇرلى جول» جاڭا ەكونوميكالىق ساياساتتارى مەن جىبەك جولى ەكونوميكالىق بەلدەۋى قۇرىلىسىن ءتۇيىلىستىرۋدىڭ ءساتتى ۇلگىسىن كورسەتتى، بۇل جەلى بويىنداعى مەملەكەتتەرگە ەكونوميكالىق گۇلدەنۋ مەن حالىق يگىلىگىن الا كەلەدى.

ۋاڭ حۋنيڭ، لي جانشۋ، ياڭ جيەچى وسى ايتىلعان قيمىلدارعا قاتىناستى.

جاۋاپتى رەداكتور: سايراش تۇرارجان قىزى

جالپى 0 پارشا لەبىز
توراپتاستار لەبىزى

ۋاقىتشا لەبىز جازىلمادى!

اتى-ءجونى: كوكەك نومەرى:

تەكسەرۋ نومەرى: